නුඹට දුක දැනෙනවා
ඇති මටත් වැඩියෙන්
අපට අප නැති උනත්
හෙටත් මේ හැටියෙන්
මතක් කර සතුටු වෙමු
පෙම් කතා කෙටියෙන් ....
රිදෙන විට නොරිද්දන
නුඹට හිත වැඩියෙන්
ලංවෙන්න හේතු තව
ඕනේද සැකෙවින්
නුඹෙන් ලද සෙනෙහසට
ණයගැති මතු මං ...
මුණ ගැසී දොඩමලුව
හෙටත් අපි මෙලෙසින්
නුඹේ ඇස් තෙත් උනොත්
මා නිසා කඳුළින්
වාවගනු බැහැ සොඳුර
නුඹට ලැදි හිත පෙම් ....
වලාකුළු ඉරාගෙන
සඳ ඇවිත් හිනාවෙන
දිනක හිත හදාගෙන
එන්න ඒ ගංතෙරට..
අපි එදා මුණගැහුනු
පෙමින් හදවත් බැඳුණු
අතීතය ගිල්වන්න
එන්න ඒ ගංතෙරට..
ගලා යන මේ කඳුළු
ගඟ දියට බර නැතිලු
හිතේ දුක පාකරමු
එන්න ඒ ගංතෙරට...
මතකයන් පමණක්ම
අපි අපේ කරගනිමු
ඉදින් අප සමුගනිමු
එන්න ඒ ගංතෙරට ...
පිපුණු මල පරවෙන
බව හොඳින් දැන දැන
සමනල්ලු ආදරේ
පතනවලු මල්වල...
පරවෙද්දි ඉගිලෙන
බව හොඳින් දැන දැන
මල් උනත් ආදරේ
කරයි සමනල් වෙත...
වස්සාන හීනයයි
ඉදින් අවසන් උනේ
හිත්වාන බිඳ දමා
ඔබයි පිටමං උනේ...
මේ තරම් රිඳවන්න
ඇයිද ඔබ ලංවුනේ
කියනවද ඉන්න හැටි
හිත හදන් ඔය වගේ ...
දිනක සඳ අමාවක
තනිව හුදකලාවක
බදා ඝන කළුවර
බිදුණු පෙම ගැන සිත
හැඬූ හැටි සිහිකර
හිනා වුනි හදවත
අදත් පෙර වාගෙම ...
අපෙ පෙම අවසන
ගතවෙලා දෙවසර
ඔබේ අත හිමි ඇය
මගේ සිත නැඟි පෙම
නාඳුනන එක ගැන
පුදුම නැහැ හිතවත ...
නමුත් පෙම් කල බව
දිවුරමින් කියු ඔබ
හමුවෙද්දි මඟ තොට
ඇයට තව තුරුළුව
නාඳුනන ලෙස යන
විටයි දුක මා ගැන ...
කුමක්දෝ නොකියපු
කතාවක් තිබුණා
තවත් හිත කකියන
හිනාවක් නැඟුනා
මටත් නුඹ හිමිවෙයි
හීනයක් තිබුණා
මගේ ඇස් බලාගෙන
නුඹ ඉවත බැලුවා
අපි එතැයි බලා සිටි
හිරු අවරේ ගිලුනා
බලා අපි සිනා සුන
සයුරු රළ සිඳුණා
මගේ ඇස් විතරක්ම
කඳුළකින් තෙමුනා.....
හිතට දුර හුඟක් තැන්
ලඟ වගේ විඳිනවා
නෙතට බර කඳුළු කැට
මගෙ නොවෙයි හැඟෙනවා
මතකයට අමතකව
යන දිනක් පතනවා
නාඳුනන සුසුමකට
තමව පෙම් බඳිනවා ..
